dingiral fulɓe

Report This Post

Report This Post

Goomu enɗam Elimaan Bubakar Kan to leydi Farayse yuɓɓinii pottital mawngal ñalnde 03/10/2009  he gardagol Mariyam Kan.  Caggal nde ceerno Saydu Kan yalti aduna ñalnde 28/09/2009  ɓesngu Muritani fof hattiima oon jaambaaro mo waɗaano ganndal mum ɓellel gajjal. Birnagol Saydu Kan barminii kala ngenndiyaŋke , dawriyaŋke e kala jiɗɗo goonga e ɓamtaare aadee he winndere ndee haa teeŋti he enɗam Afrik.   Nguu ñalngu waɗii teskuyaaji keewɗi ngati  en nganndii  nguurndam Saydu Kan nafii , kono kadi maayde makko addanii ɓesngu Muritani e renndaaɓe fayndaare huunde heewnde faayiida : Kaa  ñalawma siftinii kam aafngo Ceerno Murtuɗo fedde wiyateende  dental e kaaldigal leƴƴi Muritani. Nootiima he nguu ñalngu lanndaaji keewɗi ɗi Muritani, pelle pine , leƴƴi ceertuɗi , ngenndiyaŋkooɓe heeriiɓe , naalaŋkooɓe , seernaaɓe , e hoolaaɓe laamuuji Afrik. 

Pelle keewɗe e lanndaaji jehondirnooɗi kawrii he ngal dingiral etee gooto kala ardii no yooɗi , gollorii hakilantaagal haa gooto fof hootdi e weltaare : Pelle leydi Farayse , Belsik , Holannd Amerik  e ko nanndi heen kala nootiima. Yiili golle ɗee ko haaliyaŋke ŋanaa mo yeewtere Faandu almuudo (seneweb rajo) , woni Mammadu Aamadu Lih. Caggal juulal tiisubaar , golle ɗee puɗɗoraa ko bilnugol kaamiilu ɓuraana e gardagol Ceerno Sauku Umar Alhajji Mammadu Muusaa Lih mo Daara halayɓe. Darnde Jaagaraf Dimat hono Aamadu Jah yooɗii he nguu ñalngu, hay deftere willnaande ndee ko kaŋko soodi. Ɓaawo duwaaw  e bottaari  Sokna Mariyam Kan e goomu mum mbismii arɓe , yeewtere ndee udditaa he yeeso sokna Aysata Kan jammirteeɗo Kummba njamndi hono joom suudu Saydu Kan e ɓiyngel mum ummoriiɓe Holannd.  Mammadu Lih huufi  ginol golle , Aadama Ndonngo heedi e njuɓɓudi joɗnde. Hasan Kan rokkaa konngol , o siimti darnde ceerno Saydu  e seedanteeje jaŋde mum he ɗemngal Farayseere haa renndo ngoo weltii.
Ɓooyaani tan haa Habii Jakariyaa Kontee rokkaa konngol debbo Maqaama hoofniri neɗɗaagu , o ɓaarii he jume ɗe yimre ceerno Murtuɗo « Aadee yettetaake , yennetaake ko golle mum tan cifatee …» Habii Maymuuna Mammadu Aali jokki he wukkude konngi degiiɗi he pulaar laaɓngal. O jumpi he ñalaaɗe baban Murtuɗo haa kelle e pettaali nanndi e digaali , ngonɗam laatii waame he boredaaɗe anndunooɓe oon jaambaaro. Heewɓe kaamtii ngam waasnoode yiyondirde e Jaayre Afrik.

Caggal ɗuum rokkaa konngol ko njool jom njurum e yarlitanaade faabu koon ɗawakon mbelemma e nehdi jiɗnaaɓe to leydi Muritani , oon woni Usmaan Abdul Saar.  Oon gorko seedoriima nuunɗal jaambaraagal e ganndal Mustafa Booli Kan he nder dummbirɗi ɗi uddanoo salinooɓe yawaare ngam sooynaade Muritani janngo mo potal e kisal kala ɓiɗɗo leydi ndii. Ceerno Abda woon ummii haa Amerik ngam addude fotde e ballal mum he ngal gollal.  Abda teeŋtinii ko heewi he darnde saydu kan e eɓɓooje janngin’gol ɓe njogodinoo to Amerik  o baarnii he cuusal saydu e neɗɗaagu mum, o eerii ɓesngu Muritani e Afrik he dental , o tonngiri kumpital won’de dental rewindo golle Saydu Kan wonaa ko he tafeede. Amaadu Elimaan Kan waɗii ɗoon yimre Farayseere heewnde faayiida , o siftini golle jaambareeɓe ɓennuɓe , o jumpi he maayo miijooji Saydu , kadi o seedii ko ɓamtaare tan Mustafaa hoyɗatnoo. O wukki ɗum ko he jume payɗe tonngiraaɗe ñeeñal e ganndal to senngo yimiyaŋkaagal tawi ena duusi ɗum hoɗdu Aadama Ndonngo.

Katante leñol Kan seediima darnde Saydu darodinoo he Kawtal , o siftini aadi Saydu  waɗdunoo e Murtuɗo e Ibraahiima Saar he daande maayo won’de hay gooto  he maɓɓe jamfotaako leñol Fulɓe e ndimaagu ɓesngu Muritani. O ɓaarni haala makko ko Lislaam, o waggini yoo renndo ngoo rewindo golle wayɓe no saydu en kadi wuurduɓe ɓee njaɓa gollodaade he kala ko nafata en.                               Sammba Cooyel Bah seediima jaambaraagal e nuunɗal Saydu Kan to senngo ngenndiyaŋkaagal , dawrugol e neɗɗaagu pulaagu. O artirii ɗoon eɓɓoore makko mbele goomu ndentinoowu sirŋinaniiɓe wellitaare aadee e rewindaade golle jaambareeɓe men wooda. Nguun goomu yoo won ngu terɗe ittaaɗe he kala dental tawa ko nguun yuɓɓinta , ɗowata kala ko renndaa he nuunɗal haa gooto kala  yiytoo heen hoyre mum ko aldaa e heedi heedanaa , o tonngiri yimre o waɗnoo he duttagol Ceerno Saydu Kan.     

Usmaan Gannge weddiima ɗoon konngi juumtuɗi e daaɗe bajjamaaje , o holliti ko ngenndiyaŋke men jiɗɗo ɓamtaare leñol ngol e pinal mum hono Usmaan Kebe tintini mo ñalngu nguu ana ummorii leydi Belsiks , o jokkii heen ngati ko kaŋko jeyi.  Daawuuda Sammba Jeey  yerwiima ɓoggol taaraa , o jubbi he golle Alhajji Umar Fuutaŋke e Elimaan Buubakar Kan , o holliti ndeke ko nii tan Saydu haani wayde.   Mammadu Dem “ meer ” Golleere haalii ko waɗi faayiida , o teeŋtini ko Fulɓe fof ndenndi Saydu etee maayo wonah keerol.         
 
Aysata Taal Sal nde fayndii rokkeede konngol ; ko bammbaaɗo pulaagu mo renndo ngoo seedii darnde mum mbaawka mum hozdu , anndude fotde e ko yonta kaa laaɓndii  hono Alhajji Buubu Bah .  O  bismorii mo gaaci belɗi e daande fantaŋ haa ƴiiƴe kala peɗɗi , gooto fof faarnorii jeyi suudu baaba. Aysata Taal Sal naatiri ko Yano e cañu yeewtere soomnde ganndal e nehdi pulaagu , ƴoogaandi he tewru maayo ngo tinndi maama to enɗam tafiraa renndo nguurndam. Aysata anndinii dental ngal ndeke neɗɗo ana waawi janngude e golloraade gannde adunayaŋkooje  tawa yejjitaani ɗo daasnoo mbootu e to fijirnoo ɓiɓɓe takaɓe. O seedoriima Saydu jeewte maɓɓe keeriiɗe tuugniiɗe he ganndal e mahngo renndo ɓamtaare haa ñalnde o fawi he ndii ngaari yiytere mbayniigu. Ko ɗoon o wiyi sinno ena aaɓnatonoo maa min ngittu Ngaandi Saydu ndii , min mbaɗta he hoyre cukalel mbele gannhal ngal  ena waasa yahdeede laakara. O hollitii dawrugol laaɓndii ko jaambaraagal no Saydu nii ngati ko ɗum galle ɗe cuuɗi 3 : suudu dummbirdu , suudu maayde e suudu laamu. Aysata memii jookli kala etee haa o joofni o haastaaka. Miɗo anndi tan hannde so Habii Jakariyaa Kontee leliima o ɗaanoto ngam yananeede o teelaani he renndo haɗdoro nano.

Bubakar Jagana haalii sooniŋkoore e pulaar , o teeŋtini darnde Saydu e hoolaare nde  Ibraahiima Muktaar Saar joninoo he makko.  Usmaan Jagana  haalanii renndo ngoo ko heewi faayiida.  Baaba wuldu Jiddu haalii pulaar e safaroore , o seedii ko yooɗi , o holliti won’de Saydu ko mo yimɓe fof , o heeranaaki leñol gootol, Mammadu Soh e  Mammadu Jallo mbeltinirii joɗnde ndee seedantaagal jooɗngal e bagginaali juumtuɗi . Daawuuda Jeey e Katante leñol njubbii he njimri leele ngam ittude yimɓe e sunaare , bojji kora , golle njokkira no haaniri. Sayku Buso seediima won’de Saydu reentiniino mawɓe leñol ngol fenaande  , ngati ko juuti koo fof ko ko feeñata. Habsa Bannoor seedii Saydu ko jokkoowo enɗam etee ko o donɗo ndeen moƴƴere. Baaɗiraagel ceerno Saydu haalii toon njurminiika he Saydu , o yetti goggo makko Aysata Kan kadi o duwanii ɓesngu mum.

Ñalngu nguu uddiraa ko konngol Demmbel Sal : O ɓanngini batu goomu haɓotooɓe miijo Sammba Juulde Caam won’de yoo ɓesngu Senegaal fof njanngine ɗemngal wolof tawa ko he waawnere  njogorngu waɗeede ñalnde 17/10/2009 waktu 13 he dingiral AGORA to Mantu laa jolii he leydi Farayse. O uddiri yimre makko , yimɓe mbaynondiri he weltaare.
Mi jaarii Mayram Kan , Umahaani Kan , Mammadu Aamadu Lih e Sayku Umar Lih ngam noddaango maɓɓe yoo min mballondir he ngal gollal ngal  gooto kala waawi yiytaade heen hoyre mum no haaniri. Yoo Geno yurmo , yaafoo Saydu Kan e maayɓe juulɓe kala.
 
Kuɗol Katante Leñol Kan mo Aañam Yeroyaaɓe

Report This Post

Gannda FADIGA no jeyanoo e wammbaaɓe ɓurɓe dowlude,oo sankii ko ñande 19 septembre 2009 to Paris.

Report This Post